Ek Adhoori Koshish

Bheegi huyi si, nam si aankhein
Kai raaton se jaagi, bedum si aankhein
Phir se in aankhon me koi sapna sajaane ki
Ek adhoori koshish

Kuch kho dene ke khayal se sehma hua dil
Dil ke is darr me ajeeb si ghutan bhi shaamil
Jaan kar bhi is darr se anjaan ban jaane ki
Ek adhoori koshish

Toot kar bikhra hua khwaabon ka ek sira
Dhundhla sa gayab hota yaadon ka ek sira
In dono siron ko haath badha kar chhoo paane ki
Ek adhoori koshish

Gam ki naav me sawaar chhota sa mann
Aur paani ki har ek boond me behta akelapan
Aur Umeed ki nigaahon se khushi ka kinara dekh pane ki
Ek adhoori koshish

Is paththar ki duniya ko khone se pehle
Maut ke sirhaane sone se pehle
Zindagi se khud ke liye do aur pal churane ki
Ek adhoori koshish.


Devanshi
October 23, 2011