Ai mere mann

Ai mere mann kuch aisa karte hain

Chhod saari uljhanein, kahin aur chalte hain

Har pal dakhal deti is duniya se door

Kuch der ke liye hi sahi, mahaul badalte hain

Jahan khamoshi hi khamoshi ho chaaron or

Na waqt ki chinta na logon ka shor

Bass neela aasmaan aur use chhoo kar guzarti hawa

Suna hai khwaab me milti hai aisi jagah

Log kehte hain tu kahin bhi ja sakta hai

Jo koi na pa sake use tu pa sakta hai

Agar ye sach hai to bass kuch pal

Mujhe apne saath us khwaab me le chal

Kabhi sote huye kabhi jaagte huye

Kitna waqt gaya sapno ke peechhe bhaagte huye

Thodi si fursat ab mai apne liye bhi pa loon

Kuch dil ki sun loon, kuch dil ko suna loon

Tere kaano me dheere se...chupke se kehna hai

Kuch der ke liye mujhe us khwaab me rehna hai

Aa hum dono us khwaab ki talaash me nikalte hain

Chal mere mann...kahin aur chalte hain.

Devanshi

2003